Mae Artist y Mis yn nodwedd lle rydyn ni'n tynnu sylw at waith anhygoel un o'n haelodau.
Artist y Mis ar gyfer mis Tachwedd yw Sara Elizabeth Jones, artist wedi’i leoli yn Wrecsam sy’n gweithio mewn gwahanol ffurfiau celfyddydol gan gynnwys Celfyddyd Gain a Darlunio Ffasiwn.
"Fy enw i yw Sara ac rwy'n byw yn Wrecsam, rwy'n cael fy nhynnu i fyw yng Nghymru oherwydd y golygfeydd hardd. Yn wreiddiol cefais fy magu mewn tref o'r enw Widnes yn Cheshire. Rwyf wedi bod yn arlunio trwy gydol fy mywyd ers bod yn blentyn bach. O'r ysgol babanod fe wnes i fwynhau celf a chrefft yn fawr. Ces i fy adnabod gan athrawon a disgyblion fel plentyn artistig. Wrth dyfu i fyny roeddwn yn aml yn cael deunyddiau celf gan berthnasau. Hyd yn oed yn ystod plentyndod byddwn yn treulio oriau yn archwilio amrywiaeth o gyfryngau. Roedd hyn yn cynnwys collage, brodwaith, peintio, castio, clai, gwneud gemwaith...unrhyw beth roeddwn i'n gallu ei archwilio!
Roedd deunyddiau’n gyfyngedig yn y dyddiau hynny felly roeddwn i’n defnyddio sgrapiau cartref yn aml. Dysgais dechnegau newydd trwy lyfrau o fy llyfrgell ysgol. Rwy'n dod o deulu artistig a byddai fy ewythr yn dysgu'r hanfodion o arlunio i mi. Cyflwynodd e fi i artist o'r enw MC Escher. Dysgodd fy mam-gu a modryb gwnïo a gwniadwaith i mi. Roedd fy modryb yn wniadwraig a chreodd hi ffrogiau hardd i mi. Roeddwn wrth fy modd yn edrych ar luniadau fy modryb yn ei llyfrau nodiadau, a ddaeth yn ysbrydoliaeth yn ddiweddarach mewn bywyd.
Yn 12 oed dechreuais ddysgu fy hun sut i dynnu lluniau o ffigurau ffasiwn y byddwn wedi'u torri allan o gylchgronau. Wrth fwrdd yr ystafell fwyta byddwn i'n ymarfer lluniadu'r wyneb a'r corff dynol. Yn ddiweddarach cymerais T.G.A.U celf ac astudiais artistiaid eraill. Fe wnes i barhau i arlunio a phaentio'n rheolaidd. Dyma le y dechreuodd y sylfaen ar gyfer darlunio ffasiwn a fy nwyd am arlunio wynebau, gan fy mod yn eu ffeindio nhw'n hynod ddiddorol.
Yn fy arddegau hwyr dechreuais gael trafferth gydag iselder clinigol a phryder, byddai'n achosi i mi gael blociau creadigol a diffyg hyder ynof fy hun. Mae wedi gwneud i mi dal yn ôl rhag dangos fy nghelf yn gyhoeddus. Rwyf wedi mynd trwy gyfnodau lle byddwn yn aros y tu fewn.
Yn ddiweddarach astudiais sylfaen celf a thecstilau ffasiwn yn y coleg. Rwyf hefyd wedi mynychu gweithdai a chyrsiau fel bywluniadu i helpu i ddatblygu fy ymarfer celf. Rwy'n credu y gallwn ddysgu gan eraill bob amser. Rwyf wedi ymweld ag arddangosfeydd, orielau ac amgueddfeydd ers pan oeddwn yn fy arddegau.
Heddiw rwy'n dal i hoffi arbrofi gyda gwahanol ffurfiau celf. Ond rydw i bob amser yn mynd yn ôl at fy hoffter o ddarlunio ffasiwn. Rwyf wedi cadw fy holl lyfrau braslunio ar hyd y blynyddoedd er mwyn i mi allu gweld y dilyniant yn fy ngwaith. Daw ysbrydoliaeth o'r byd o'm cwmpas ac rwy'n ei recordio trwy ddelweddau. Llyfrau braslunio yw fy noddfa, man lle gallwn ddianc rhag y meddyliau negyddol sy'n trafferthu fy meddwl. Mae defnyddio lliwiau bywiog a chanolbwyntio ar greu harddwch yn helpu fy iechyd meddwl.
Rwyf wedi fy ysbrydoli gan oesoedd y gorffennol a darlunwyr ffasiwn Ffrengig fel Erte. Mae llawer o bobl wedi gwneud sylwadau am y lliwiau llachar yn fy ngwaith. Rwyf wedi fy ysbrydoli gan y mudiad Fauvism a chelfyddyd Bop. Rwy'n hoff iawn o artistiaid fel Henry Matisse a'i ddefnydd o liw dirlawn. Dwi hefyd yn ffan o'r arlunydd Francis Bacon, ei allu i beintio poen dynol a'r cyflwr dynol.
Fy hoff gyfrwng i'w ddefnyddio yw dyfrlliw ac inc oherwydd eu rhinweddau mynegiannol. Mae fy ngwaith yn gymysgedd o gelfyddyd gain a darlunio ffasiwn.
Drwy gydol fy mywyd rwyf wedi ennill cystadlaethau celf ac yn 2022 derbyniais wobr cydnabyddiaeth. Rhoddodd y wobr ymdeimlad o gyflawniad i mi a rhoddodd hyder i mi ddal ati. Gall cymryd rhan mewn unrhyw fath o weithgaredd creadigol gael effaith ddofn ar les person. Mae celf wedi profi i roi cysur ac iachâd i'r meddwl. Mae'n ein galluogi i sianelu ein hemosiynau a dod o hyd i ymdeimlad o bwrpas yng nghanol tywyllwch. Mae celf wedi trawsnewid fy iechyd meddwl, ac rwy’n annog eraill i archwilio eu potensial creadigol eu hunain.
Heddiw rwy'n dal i gael trafferth gydag iselder a fy iechyd. Ond mae amgylchynu fy hun â lliw a chanolbwyntio ar greadigrwydd yn therapiwtig iawn. Mae'n ffordd o drawsnewid emosiynau a phrofiadau negyddol yn weithiau celf bwerus. Un darn arbennig sy'n arwyddocaol iawn yw fy narlun o fenyw yn crio, sy'n cynrychioli'r boen rwy'n ei brofi o Ffibromyalgia. Trwy fy nghelfyddyd, darganfyddais ffordd i fynegi'r ddirboen annisgrifiadwy sy'n aml yn cyd-fynd â'r cyflwr hwn. Trwy'r gweithiau hyn y mae pobl yn aml yn dweud eu bod yn gallu gweld agweddau ohonof i fy hun. Nid wyf am i iselder a phoen cronig ddiffinio pwy ydw i ond yn hytrach bod yn gatalydd pwerus ar gyfer trawsnewid.
Mae cynlluniau ar gyfer y dyfodol yn cynnwys arddangos gwaith, gobeithio cael mwy o gyfleoedd ac amlygiad artist. Rwyf hefyd wedi dechrau archwilio’r defnydd o’r gair llafar fel offeryn ar gyfer hunan fynegiant."
Darganfod mwy am waith Sara ar Instagram: @sara_fashion_illustration
